Pehli udaan!!!

Aaj udnaa hai tujhe!!!

Jahan tak nazar jati, dikhta khula aasman hai,
deta bulava, tu dekh parindey, kaisi meri shaan hai,
cheer ke in hawaon ko, tu aaj mujhme sama jaa,
aazma apni fitrat, faila apne pankh, tu chaa ja,

Is drishti ki seemayein laangh, har dum aagey badhna hai tujhe,
Aaj udnaa hai tujhe!!!


Na darr in unchein parvaton se, kab inse koi haara hai,
kya bisaat in saagron ki, inka bhi ek kinara hai,
vishwaas jaga, tu kadam utha, yeh surya tapan bujh jayegi,
har mushqil hogi aasaan, vaayu sangeet sunaegi,


Chodh bhay ka kavach, toofano se ladna hai tujhe,
Aaj udnaa hai tujhe!!!


Kab tak chipaa rahega ek saaye sa, tu saamne aa,
jab hai taakat, toh juta himmat, tu maan zara,
kar kooch, har disha dekhe bas raah teri,
aazaadi ka hai yeh sunehra pal, na kar aur deri,

Girega, gir kar sambhlega, par na kabhi bikharna hai tujhe,
intezaar kar rhi hai teri "pehli udaan", 
Aaj udnaa hai tujhe!!!




[This is my first ever blog post. Through this blog, I intend to regain my love for writing. Kindly comment and provide feedback. :) ]